مدونة سنة رابعة.

  

 

 

مدونة سنة رابعة

 

"رغم امتداد التعب عيّا يموت الطموح..

والشمس بكره ورغم أنف الدجى شارقة!

 

هنا تلقون تجربتي في سنة رابعة، أتمنى إنها تكون مفيدة لكم.

-راح أتكلم عن البلوكات بحسب الترتيب اللي درسته-

 

بالبداية فيه أشياء عامة مهم تعرفونها:

-      كل بلوك بيكون عبارة عن ٨ أسابيع (٣ أسابيع في CTC + ٤ أسابيع Hospital rotation + أسبوع الاختبار. (راح أتكلم عنها بالتفصيل تحت كل بلوك).

-      بكل بلوك بتلقون فيه هالمسميات:

Theme class

PS session

CI session

Interactive seminar

CC session

طريقتهم تختلف على حسب البلوك وبنتكلم عنهم بالتفصيل + وطبعاً بكل بلوك عندنا ميد وفاينل وأوسكي.

-      توزيع الدرجات نفسه بكل بلوك وبيكون على هالترتيب:

15%	CTC (تشمل الحضور والمشاركة)
10%	MID (MCQ)
20%	FINAL (MCQ)
5%	PROBLAM SOLVING (MID)
5%	PROBLAM SOLVING (FINAL)
15%	HISPITAL ROTATION ASSESSMENT
30%	OSCE

 

-      نصائح عامة:

• بسنة رابعة خلوكم بروفشنال قد ما تقدرون الدكاترة يهمهم هذا الشئ جداً, ألتزموا بالوقت, خلوا مظهركم مرتب, انتبهوا لأسلوبكم في النقاش مع الدكتور.
• تعاونوا مع بعض بكل حاجة، بتلخيصات وتفريغات وغيرها, راح يفرق كثير هالشيء معاكم وحتى الدكاترة إذا شافوا الكلستر متعاون مع بعضه, يتعاونوا معه.

 

• كل بين فترة وفترة سألوا الدكاترة ايش اللي داخل معاكم، غالباً بيحذفون لكم كم شي أو بيخففون عليكم. 

 

• بالنسبة للبروبلم سولفنق:

 

-      مواضيع البروبلم سولفنق عادة تكون شيء مهم جداً في التخصص والدكاترة جابوا طاريه كثير وشرحوه كثير ( ماعدا في السرجري الدكتور نكبنا بموضوع ماكان داخل معنا في الاختبار\ في اللايف سايكل الدكتورة جابت كيس غريبة ومحد كان متوقعها)

-      أقرأوا السؤال أكثر من مرة وبتركيز، حددوا الكلمات الدلالية المهمة في الحالة  واعرفوا ايش المطلوب بالضبط من السؤال.

-      اكتبوا جوابكم بطريقة مهنية وبخط واضح. اختصروا إذا السؤال طلب اختصار وفصلوا إذا طلب تفصيل.

-      إذا كان فيه سؤال شكيتوا بإجابته، لا تكتبوا كلام كثير إلا إذا حسيتوا إنه الكلام اللي بتكتبوه ممكن يضيف حاجة , بس إذا بتكتبون بس عشان تعبون سطور, ما أفضل هذا الشيء بيخلي الدكتور يحس إنكم مو بروفشنال.

-      إذا السؤال طلب تعداد, اكتبوا بالعدد المطلوب, الكتابة الزايدة ما تخلي الدكاترة يحسوا إنكم دوافير بالعكس!

 

• بالنسبة للاوسكي:

-      التدريب هو مفتاح النجاح, تدربوا كثير كثير على الفحص, مع زملائكم مع أهلكم بالبيت, قد ما تدربتوا قد ما صار الموضوع أسهل وقد ما كنتوا مرتاحين خلال الاختبار.

-      خلكم بروفشنال, أول ما تدخلون سلموا بصوت عالي وواضح, عرفوا بأنفسكم للدكتور وللمريض, عقموا يدينكم, اجلسوا بالمكان المخصص لكم بكل هدوء وثقة.

-      خلال الفحص, الدكاترة يهمهم إنكم تهتمون بالتواصل مع المريض, خليكم لطيفين في الفحص وانتبهوا يتعور المريض J .

-      إذا أنسألتوا سؤال ماتعرفون جوابه, حاولوا تفكروا شوي إذا ما عرفتوه, شخصياً أفضل إني أقول ما أعرف وما أحب أتفلسف كثير J.

-      أعرفوا المطلوب بالضبط منكم، و أقروا السيناريو كويس .. مثلاً:

فيه فرق بين Heart examination and cardiovascular examination ….

-      إذا نسيتوا خطوة بنص الفحص حاولوا ما تتوتروا وامشوا للخطوة اللي بعدها.

 

• بالنسبة للهوسبتل روتيشن:

-      استغلوا وجودكم في المستشفى وحاولوا تشوفوا أكبر عدد ممكن من المرضى، أغلب المرضى متعاونين وبيتجاوبوا معكم بشكل كبير.

-      أخذوا هستري قد ما تقدرون , المفروض تطلعوا من سنة رابعة وانتوا بروفشنال وبيرفكت في الهستري.

-      أغلب الروتيشنز ممتعة ومفيدة, و الحلو إنكم مو ملزومين بوقت معين يعني حتى لو خلص وقت الدوام الرسمي عادي تظلون في المستشفى للوقت اللي تبون.

-      بعد الروتيشنز في كل بلوك بيكون فيه تقييم ع الحالات اللي شفتوها, طريقة التقييم تختلف من بلوك لبلوك ومن دكتور لدكتور على الأغلب بيكون عبارة عن برزنتيشن تسوونه ع حالة شفتوها في المستشفى.

(في بلوك الموفمنت مع د. سعود قيمنا بنفس وقت المستشفى طلب منا نسوي بعض الاكزامنيشن وسألنا كم سؤال عن الكيس)

ــــــــــــــــــــــــــــــــــــــــــ

قبل نبدأ نتكلم عن البلوكات, بنتكلم عن البي دي:

 

البي دي بيكون عبارة عن خمسة أسابيع (A B C D E ), أول أسبوعين بتدرسونهم قبل الدراسة ب أسبوعين, بعدين قبل كل بلوك بتدرسون أسبوع بي دي, كل أسبوع بيكون مطلوب منكم تسلمون مودل فايل وبيكون فيه سشنات.

PS session > physical examination sessions

CI session > history taking sessions

ب أسبوع A : السشنات بتكون عن الاكزامنيشن و الهاند هايجين.

 

باقي الأسابيع بتكون ب هالترتيب:

-      يوم الاثنين بيكون عندكم ريكوردنق سشن مع سميوليتد بيشنت:

بيكون فيه بيشنت وبتاخذون منه هستري أو بتسوون اكزامنيشن حسب المطلوب منكم. وبتكون المقابلة مسجلة بالفيديو.

-      يوم الثلاثاء نقاش ع المودل فايل اللي كتبتوه ع الريكوردنق:

المودل فايل عبارة عن فورم تعبونه وبيعلمونكم كيف تعبونه.

-      يوم الأربعاء كتابة المودل فايل بشكل نهائي:

بتاخذون تسجيل المقابلة وبتسمعونها وبتكملون الناقص في المودل فايل وأيضا تاخذون فيدباك على أنفسكم وتشوفون وش الزين والشين.

-      يوم الخميس تسليم المودل فايل وفيدباك عن الريكوردنق:

بعد ما تشوفون التسجيل المفروض تكملون المودل فايل وتسلمونه للبرديوسر, وتسوون برزنتيشن على اللي صار بالسشن: the good and bad points.

 

كل أسبوع بيكون الهدف منه شيء معين يعني مثلاُُ أول أسبوع المفروض هستري ثاني أسبوع اكزامنيشن و... آخر أسبوع اللي هو أسبوع E  بيكون عبارة عن اختبار في كل اللي اخذتوه.

طبعا دفعتنا وصلنا لأسبوع  C والباقي ما اخذناه عشان كورونا.

----------

بتحسوون بلخبطة كبيرة بالبداية بس د. جيهان (الكوردنيتر) بتسوي لكم محاضرة وبتعلمكم عن كل شيء من وإلى ويمديكم تسألونها عن إي شيء بأي وقت.

 

 

 

 

 

 

 

 

 

 

 

 

 

 

 

 

 

 

 

 

 

 

 

-      Movement block

 

الكوردنيتر:

د أحمد كمال.

 

الدكاترة:

العظام: د أحمد كمال \ د. شاهي \ د. نايف \ د. عمر

الأعصاب: د. سعود \ د. أشرف (طبعاً د. سعود طلع من الجامعة حالياً عشان بيكمل دراسة)

العيون: د. كبيري \ د. سيف\ د. ولاء

الطب النفسي: د. سايما \ د. شاكيل  \د. علي السعد (ما جانا في السشنز بس جانا بالهوسبتل روتيشن وبالاختبار).

 

المواد:

المواد الأساسية في البلوك: الأعصاب والعظام.

المواد الفرعية: العيون والطب النفسي.

 

 

المراجع: 

• العظام:

-      كتاب  apley’s: كتاب جميل للأمانة ومفيد أنصحكم تشترونه وتذاكرون منه من بدري لإنه يفصل كثير وياخذ وقت في المذاكرة بس شامل لكل شيء. 

-      محاضرات وتفريغات السنوات اللي فاتت: شخصياً اعتمدت عليها في بعض المواضيع فقط مثل الكسور لإنه ما امداني أذاكرها من الكتاب.

-       كلام الدكاترة في السشنز: مهم ويجيبون منها وبعض الدكاترة يسألوا عن الأشياء اللي يذكرونها في الأوسكي  (د. نايف و د. عمر).

 

• الأعصاب: 

-      محاضرات د أشرف بسنة ثانية مع التفريغات: شخصياًَ اعتمدت عليها وكانت كافية جداً حتى بدون الرجوع للكتاب. (أصلا د. أشرف مايحب كتاب النيورو حقنا)

-       كلام د سعود في السشنز مهم حيل كتبوا كل حاجة وياه, والشيء اللي يركز عليه كثير معناتها بيجي في الاختبار.

 

• العيون: 

-      محاضرات د كبيري مع التفريغات بسنة ثانية: على كلامها إنه اللي يحط الأسئلة هو د. سيف وهو يحب الكتاب ويجيب منه ف التفريغات لوحدها ماتكفي, حاولوا تقرأوا الكتاب.

-      د كبيري بتشرح لكم كم موضوع في السشنز, ذاكروهم كويس مهمين.

 

• الطب النفسي: 

-      الكتاب: كان المرجع الأساسي بالنسبة لي.

-      محاضرات سنة ثانية مع التفريغات: ممكن تقرأوها ك مراجعة قبل الاختبار لو ما امداكم الوقت تقرأون الكتاب بس ما أعتقد إنها شاملة لوحدها.

-      في السشنز جات لنا د. سايما بس بصراحة ماكان كلامها مفيد كثير كان كله إعادة.

 

CTC weeks:

مثل ما قلت فوق بتكون عبارة عن ٣ أسابيع, أسبوع بيكون للعظام وأسبوع للأعصاب وأسبوع للعيون والطب النفسي, بيكون كل الكلستر مع بعض. (الميل بيبدأون بتخصص والفيميل تخصص ثاني بعدين بتنعكسون).

Theme class:

بتكون عبارة عن محاضرات عادية بتنشرح لكم من الدكتور, والمواضيع اللي تنشرح هنا غالباً تكون مهمة للاختبار, ذاكروها كويس أغلبها بتكون مواضيع للعيون.

 

PS session:

العظام:

Hip ex + spine ex + knee ex + shoulder ex + musculoskeletal ex

 

الأعصاب: 

Higher brain function ex + motor ex+ cranial nerves ex + sensory ex + coordination and balance ex

 

العيون: 

Ophthalmological ex

 

الطب النفسي: 

Mental state ex.

 

في هذا النوع من السشنز بتاخذون الفيزيكال اكزامنيشن المتعلقة بالتخصص, بتكون الخطوات موجودة بالمنيوال, الدكتور بيسوي قدامكم الخطوات على المريض و بعدين بيخليكم تطبقون, حاولوا تطبقوا قد ما تقدروا عشان يسهل عليكم الموضوع في الاوسكي.

- في العظام والاعصاب عادة الوضع بيكون زحمة ومافيه وقت إنه الكل يطبق, فحاولوا تطبقوا على بعض أول بأول عشان ما تضيعون.

- في العيون والطب النفسي كان فيه مجال ف تقريباً الكل طبق.

 

CI session:

عبارة عن هستري بتكون الحالات عندكم في المنيوال و فيه تقسيم للأدوار بيوصلكم من الكوردنيتر أقروا الحالات قبل السشن أفضل, عادة الدكاترة بيشرحون لكم الهستري والأشياء المهم نسألها بكل تخصص بعدين بيخلونكم تطبقون.

 

Interactive seminar:

في هذا البلوك بتكون عبارة عن مواضيع بتنرسل لكم من الكوردنيتر ومقسمة بينكم كل شخص بيكون له موضوعين في تخصصين مختلفين وراح تسوون الموضوع كعرض بوربوينت وتعرضونه قدام الدكتور وتتقيمون عليه, سهالات بالغالب وتجميع درجات.

 

CC session:

بتكون يوم الخميس من كل أسبوع, وهذا كإنه التقييم النهائي لشغلكم خلال الأسبوع, كل مجموعة من الطلاب بتكون مسؤولة عن تخصص معين مع دكتور معين, بتاخذون دور الطبيب والدكتور بيكون المريض (أو ممكن يجيب سميوليتد بيشنت) , كل شخص بياخذ منه التاريخ المرضي ويسوي له الفحوصات اللازمة ويعطي تشخيص وممكن الدكتور يطلب العلاج بعد. ممكن تسألون الدكتور اللي بيجيكم عن إيش المواضيع اللي تركزون عليها بعضهم يقول بعضهم لا. (طبعاً الطريقة بشكل عام تختلف من الدكتور للثاني، في العيون مثلاً د. كبيري توزع الحالة على ٣ -٤ طلاب واحد يأخذ التاريخ المرضي واحد يسوي الفحص وهكذا.. وماتسوون الفحص بس تقولون اسم الفحص اللي تبون تسوونه والدكتورة تعطيكم النتائج \ في العظام لا كل شخص يمسك الحالة لوحده من وإلى ويسوي الفحص قدام الدكتور ..)

*الحضور ممكن ما يكون إجباري لكل الطلاب, تأكدوا من الدكتور اللي بيجيكم بس لا تسألون الكوردنيتر عشان ما يأخذ عنكم فكرة إنكم ما تبون تتعلمون :).

 

 

الهوسبتل روتيشن: 

• العظام: مستشفى الملك فهد + مستشفى الأحساء + عيادة الجامعة مع الدكاترة. 
• العيون: عيادة الجامعة مع د. كبيري.
• الأعصاب: مستشفى الاحساء + مستشفى بن جلوي 
• الطب النفسي: مستشفى الصحة النفسية + مستشفى الاحساء (طبعاً في مستشفى الصحة النفسية ماراح تدخلون لوحدكم تنتظرون الدكتور يجي وتدخلون معاه, وخلكم حذرين جداً في التعامل مع المرضى لإنه ممكن ما تكون  حالتهم مستقرة).

 

بالنسبة للمستشفيات الحكومية , في المستشفى بتكونوا مقسمين كل ٨ طلاب تقريباَ مع دكتور , تواصلوا معه عشان تعرفون متى تروحون المستشفى عادة بيطلب منكم تروحون قبله بساعة عشان تدورون ع الحالات, بعدها بيجي الدكتور ويتناقش معاكم ع الحالات اللي شفتوها ممكن يخليكم تروحون للحالة ثانية وتسوون الفحص قدامه وبيكون فيه تقييم, بالنسبة لمستشفى الأحساء بتروحون لعيادة الدكتوراللي مسؤول عنكم وبتشوفون الحالات اللي عنده وإنتوا وحظكم أحياناً مايكون عنده مرضى كثير وممكن إذا عنده عمليات يدخلكم.

 

الاختبارات: 

بشكل عام مستواها متوسط، ما يجيبون شي برا المواضيع المطلوبة منكم، بس يحتاج تكونوا فاهمين الموضوع بشكل صح وملمين فيه ولو كان فيه اوبجكتفز في المنيوال حاولوا تغطوها.  ب هالبلوك أنصح بالتركيز على التجميعات كثير يجي منها.

إذا ماكان عندكم وقت للمراجعة، افتحوا التجميعات وشوفوا المواضيع المتكررة وركزوا عليها. 

 

الاوسكي: 

الاختبار عبارة عن ١٢ ستيشنز, كل ستيشن ٧ دقايق.

موزعة ب هالترتيب:

4 Physical examination

4 Multi-media

2 History taking

1 6-step treatment plan

-      الملتي ميديا عبارة عن صورة أو فيديو له علاقة بإي حاجة درستوها في البلوك, ممكن سندروم معينة, ممكن ساين وهكذا..

-      ٦ ستب, هي حالة وحدة بس عبارة عن ٢ ستيشنز وحدة تقرون فيها الكيس والثانية تعبون الفورم, بكتب لكم الستيشنز اللي جت لنا فقط عشان تكون عندكم فكرة وتفهمون قصدي:

• Examination ortho - Knee ex 
• Examination neuro 9th - 12th Cranial nerve ex
• Examination psych - Mental state ex 
• Examination ophtha- Extra-ocular muscle ex
• History taking ortho - frozen shoulder 
• History taking psych - panic disorder
• 6 - step treatment plan - Diabetic neuropathy 
• Multi media. مو ذاكرتها للأسف :)

 

الاختبار بشكل عام كان سهل نسبياً، وبرضو كثير من التجيمعات، والدكاترة كانوا لطيفين ومتعاونين "الاغلب", الدكاترة أغلبهم دكاترة الكلية بس كان فيه كم دكتور من برا.

 

نصائح: 

• البلوك نوعاً ما ثقيل ويحتاج مذاكرة واجتهاد أول بأول خصوصاً ماقبل المد. 
• رتبوا جدولكم بدري وحاولوا تبدأون بالتخصص الأصعب بالنسبة لكم بالنسبة لي بدأت بالاوفثا لأني كنت شبه ناسيته".
• البلوك فيه فرصة كبيرة جداً للتعلم ومتأكدة بيكون فيه قفزة ف كمية معلوماتكم لو      استغليتوا البلوك وشديتوا حيلكم. 
• البلوك صحيح ضغط، بس ممتع جداً وأغلب الدكاترة متعاونين وجيدين. 
• اختاروا لكم رفرنس واحد وثبتوا عليه لا تشتتوا نفسكم بأكثر من مرجع، بس تأكدوا إنه المرجع يغطي كل المطلوب منكم تعرفوه. 
• د. أحمد كامل طيب ومتعاون للإمانة ما حسيت إنه نكبنا بشيء.

 

ـــــــــــــــــــــــــــــــــــــــــــــــــــــــــــــــــــــــــــــــــــــــــ

 

 

 

 

 

 

 

 

 

 

 

 

-      Life cycle 3 block  

 

الكوردنيتر:

د. أنصاف. 

 

الدكاترة:

النساء والولادة: د. أميرة \ د. فهميدا \ د. حميراء \ د. لطيفة \

 د. فاطمة الخميس \ د. إلهام.

 

الأطفال: د. أنصاف \ د. دعاء \د. جيهان \ د. رباب

 

المواد:

المواد الأساسية في البلوك: النساء والولادة - الأطفال

 

 

المراجع: 

• النساء والولادة: كتاب  Beckman’s هذا المرجع الأساسي, ذاكروه بكل ما فيكم من ضمير, حطوه تحت مخدتكم..

 ما تطلع الأسئلة برا عنه بس تأكدوا من رقم الطبعة المطلوبة منكم.

 

• الأطفال: كتاب Nelson دكاترة الأطفال يعتبروا هذا الكتاب مقدس وهو المرجع الأساسي لكل شيء يخص الأطفال، بعض المواضيع بترسل لكم الدكتورة ملفات خارجية لإنها ممكن ما تكون كافية بالكتاب, بس بشكل عام الكتاب لا يطيح من يدكم ذاكروه كويس. وبالنسبة للمراجع اللي بترسلها لكم الدكتورة سألوها عنهم وإذا كل الكلام داخل معكم أو جزء بس.

 

CTC weeks:

هالبلوك مو مثل البلوك اللي راح, راح يقسمون الفيميل (والميل)  لمجموعتين مجموعة تأخذ نساء وولادة ومجموعة أطفال بعدين العكس وهذا الشي حلو عشان يمديكم تساعدون بعض.

 

Theme class:

لا يوجد.

 

PS session:

 

النساء والولادة:

Vaginal examination + speculum and pap smear + Leopold maneuver ..

ناسية الباقي..

 

الأطفال: 

Newborn ex + abdominal ex + cardiovascular ex + respiratory ex + neurological ex

 

نفس فكرة البلوك اللي راح بس ب هالبلوك أشوف التحضير مهم جداً  يعني حتى لو بس قبل السشن تقرون السشن عن شنو ع السريع من المنيوال بيكون شي كويس. وحتى الدكاترة أحياناً يسألون ويقيمون عشان يعرفون مين اللي يحضر, الشي الكويس ف هذا البلوك إنه الدكاترة حريصين جداً على إنه الكل يطبق حتى لو جزء بسيط من الفحص وأغلب الأشياء فعلا طبقناها مع الدكاترة, فحوصات الأطفال سهلة وماخذينها أكثر من مرة والناس اللي بتدرس مدسن وسرجري قبل بيكون عليهم أسهل وأسهل بعد. بالنسبة للنساء والولادة كل الفحوصات جديدة عليكم وأنصحكم إنكم تركزون كثير مع الدكاترة وتطبقون خطوة بخطوة لإنه يمكن ما يكون عندكم فرصة ثانية للتطبيق.

 

 

CI session:

برضو نفس فكرة البلوك اللي راح, بس دكاترة اللايف سايكل جديين أكثر ف مثل ما قلت قبل أٌقروا الكيسات من قبل و اعرفوا كيف تاخذوا هستري كويس (طبعاً الهستري سواء في الأطفال أو في النساء والولادة فيه بعض الاختلافات ف حاولوا تقرون المودل فايل قبل السشن).

 

Interactive seminar:

فيه بعض الاختلافات, بيكون كل الكلستر ميل وفيميل مع بعض وبيكون في الكلية, بتحدد لكم الدكتورة القاعات وبترسل لكم, بالنسبة للأطفال بيكون عبارة عن كيس وأسئلة, وأنتوا مقسمين لمجموعات بتتقسم الحالات و الأسئلة عليكم ومطلوب منكم تسوون برزنتيشن وتعرضونه. (بتقولكم الدكتورة إنه لازم كل الطلاب في المجموعة يكونوا مستعدين للعرض لإنه الاختيار بيكون عشوائي, بس صراحة احنا كنا نقرر من قبل ونختار على كيفنا وماكانت تقول لنا شيء). بالنسبة للنساء والولادة بتسوون العرض وبترسلونه للدكتورة بس غالباً ماراح تشرحون لإنه الدكاترة هم اللي بيشرحوا. 

 

CC session:

بتتقسمون ناس بيكون عندها سي سي بيديا وناس بيكون عندها اوبي قايني, نفس ما قلنا قبل بيكون فيه سميوليتد بيشنت وإنتوا الدكاترة, والدكتورة بتسمعكم وبتقيمكم, تاخذون هستري في الاوبي قايني ما بتسوون فحص بس الدكتورة بتسألكم كم سؤال عن التشخيص والعلاج وبتقييمكم, في البيديا بيخلوكم تسوون فحوصات حتى لو ماكان لها علاقة بالكيس اللي عندكم وبعدها بتتقيمون, والحضور إجباري للكل.

 

الهوسبتل روتيشن: 

النساء والولادة: مستشفى النساء والولادة + مستشفى الأحساء

الأطفال: مستشفى النساء والولادة + مستشفى الأحساء

 

نفس الفكرة بتتوزعون وبتنقسمون, للأمانة الروتيشن ب هالبلوك من أمتع وأفيد الروتيشنز, خصوصاً الأطفال كان جداً ممتع ومختلف, التعامل مع الأطفال وأمهاتهم أضاف لنا الشيئ الكثير والشيئ اللي صدمنا إنه أغلب الأمهات كانوا متعاونين معانا من ناحية أخذ التاريخ المرضي والفحوصات وبرضو الحالات كانت متنوعة وشفنا أشياء ما توقعنا نشوفها.

بالنسبة للنساء والولادة, برضو أغلب المرضى متعاونين ولطيفين. تقدرون تروحون غرف الولادة وتحضرون الولادة كاملة, بعض البنات بعد صارت لهم فرصة إنه يحضرون عمليات, بشكل عام الدكاترة بيجونكم فترة معينة ساعتين بعدين اللي يبي يمشي واللي يبي يحضر ولادة وعمليات يروح للقسم يعني الموضوع كله بيدكم ماحد بيقولكم لا.

بالنسبة لمستشفى الأحساء بعد كانت العيادات أغلبها زحمة وفيها تنوع في الحالات, في النساء والولادة دخلنا عمليات مع الدكاترة برضو.

*نقطة مهمة، إذا فيه موضوع إنتوا مو فاهمينه كويس أو تحتاجون توضيح تقدرون تبلغون الدكتورة اللي بتجيكم وتطلبون منها تشرحه الأغلب يوافق. (يفضل تبلغونها قبل بوقت عشان تستعد). وإذا ماكان عندكم موضوع ببالكم أطلبوا من الدكتورة تشرح لكم شيء هي تشوفه مهم وضروري تكونوا فاهمينه.

 

 

الاختبارات: 

مستوى الاختبارات ب هالبلوك فوق المتوسط, الأسئلة أغلبها ماتكون مباشرة يعني تحتاج فهم وربط معلومات, د. أنصاف للأمانة مش متعاونة كثير خصوصاً لو شافت إهمال من الطلاب, ف الميد بترسل لكم المواضيع اللي معكم ومواضيع الميد أغلبها سهل وأنتوا ماخذينه من قبل, في الفاينل رفضت رفض تام إنها تحدد لنا شيئ أو تحذف شي, أمشوا ع الاوبجكتفز اللي بالمنيوال, وسألوا الدكاترة ايش الأشياء المهمة واللي يحبون يجيبونها بالاختبار, وذاكروا أول بأول بعد الميد, ارتاحوا كم يوم بعدها ارجعوا للمذاكرة, البلوك يعتبر ضغط ما أكذب عليكم لكن إنتوا قدها باذن الله.

 

الاوسكي: 

شخصياً أشوف الاوسكي ب هالبلوك أسهل وأريح من بلوك الموفمنت, المنيوال واضح جداً اعتمدت عليه في المذاكرة مع الملاحظات اللي كنت أكتبها مع الدكاترة في الشرح, مثل ما قلت قبل مفتاح النجاح في الاوسكي هو التدريب الكثيف, قبل الاختبار بأسبوع طلبنا من د. أنصاف إنها توفر لنا المودلز عشان نطبق عليهم, ووافقت (بس بدون الدكاترة) يعني كل مجموعة راحت وطبقت الفحوصات وكانت الحركة هذي مفيدة جداً وأنصحكم فيها.

فكرة الاختبار نفس البلوك اللي راح, والتوزيع كان مثل كذا:

4 Physical examination: two obs\gyne, two pedia

4 Multi-media:  two obs\gyne, two pedia

2 History taking: one obs\gyne, one pedia

2 6-step treatment plan: one obs\gyne, one pedia

 

الستيشنز اللي جات لنا:

• Examination peadia- abdomen
• Examination peadia- Heart
• Examination gyne- Speculum and pap smear
• Examination gyne- Leopold maneuver 
• 6 - step treatment plan gyne – menopause
• 6 - step treatment plan peadia – epiglottitis
• History taking gyne – مو ذاكرتها
• History taking peadia - UTI
• Multi media. 

 

 

 

 

 

نصائح: 

·      أنا متأكدة إنكم سامعين كثير كلام سلبي عن بلوكات اللايف سايكل وإنتوا أوردي مجربينها ومجربين الدكاترة وكيف أسلوبهم وطريقة تعاملهم بس اللي أبغى أقوله, لا تدخلوا البلوك بطاقة سلبية حاولوا تنسوا اللي فات وللأمانة طريقة تعامل الدكاترة بسنة رابعة كان مختلف عن سنة ثالثة, ولا تسمعون لكلام أحد كل شخص له وجهة نظر مختلفة وعاش تجربة مختلفة فيه ناس يشوفون بلوك اللايف سايكل أسهل من الموفمنت وناس العكس فهي اختلاف في وجهات النظر.

·     هذا البلوك توقعوا كل شي غير متوقع, ذاكروا كل شي معاكم لا تقولون إنه هذا الشي سهل\صعب\نادر وممكن ما يجي, حرفياً إي شيء ممكن يجي بالاختبار وتنسألون عنه.

·     دكاترة اللايف سايكل جديين ويتوقعون من الطلاب أشياء كثير, حاولوا تبينون لهم إنكم تعرفون وفاهمين, حاولوا تراجعون مواضيع السنة اللي فاتت ولو شيء بسيط.

·     د. أنصاف شديدة وتجلدنا بكلامها دائماً بس بنفس الوقت مو شريرة إذا شافتكم مجتهدين وتذاكرون, حاولوا ماتتصادمون معها ولا تجادلونها كثير.

 

ـــــــــــــــــــــــــــــــــــــــــــــــــــــــــــــــــــــــــــــــــــــــــ

 

 

 

 

 

 

 

 

 

 

 

 

 

 

 

 

 

 

 

-      Surgery block

 

الكوردنيتر:

د. هيثم العرفج

 

الدكاترة:

الجراحة: د. أسامة \ د. شريف \ د. أحمد عودة \ د. عبدالقدير \ د. عايشة \ د. سارة \ د. محمد ياسر \ د. أحمد موسى \ د. ماليك \ د. منال.

الأنف والأذن والحنجرة: د. وفاء \ د. إبراهيم الجبر \ د. عبدالله العرفج

(طبعاً في كل السشنز كانت تجينا د. وفاء بس د. إبراهيم ود. عبدالله يحطوا أسئلة الاختبار معها ويجوا في الاوسكي).

 

المواد:

المواد الأساسية في البلوك: الجراحة و الأنف والأذن والحنجرة.

(فيه جزء من العظام راح تدرسونه ب هالبلوك بس مو مهم وغالباً ماراح يكون داخل في الاختبار).

 

 

المراجع: 

الجراحة: المرجع الأساسي واللي تجي منه الأسئلة بالاختبار هو Burket  بس تقريباً كل دكاترة الجراحة يذموه وما يحبوه وللأسف الكتاب فيه أخطاء كثيرة بس إنه هو المرجع المعتمد, كتاب Browse  من أكثر الكتب اللي الدكاترة يمدحوها خصوصاً للاكزامنيشن ود. أسامة بيقول لكم إنه لازم تشترونه وبسنة خامسة بيكون هو المرجع الأساسي حسب كلامه.

اللي حاب يتوسع أكثر ممكن يقرأ من Bailey and love.

شخصياً اكتفيت ب Burket   وما قرأت من مصدر ثاني وكان كافي بالنسبة لي.

 

الأنف والأذن والحنجرة: أتوقع الكل يعرف إنه كتابنا من أسوء الكتب للأسف, ومو شامل لكل المواضيع المطلوبة لذلك د. وفاء بتشرح لكم المواضيع المهمة وإي شي تشرحه يعني بيجي منه بالاختبار فرغوا كلامها, شرحها كافي ووافي ماراح تحتاجوا ترجعوا للكتاب في المواضيع اللي هي تشرحها, المواضيع اللي مو موجودة بالكتاب كلموها عليهم وراح ترسل لكم محاضراتها أو ممكن تحذف الموضوع إذا ما كان مهم, أيضاً في السيرفر راح تلقون تلخيصات لبعض المواضيع ممكن تفيدكم.

 

CTC weeks:

بتكون ٣ أسابيع، أسبوع ENT و أسبوعين جراحة, للأمانة أسبوعين الجراحة أغلب السشنات مضيعة للوقت ومافيها شي مهم, وماراح تنقسمون لقروبين بيكون الوضع نفس بلوك الموفمنت كل الميل مع بعض وكل الفيميل مع بعض.

 

Theme class:

 

لا يوجد.

PS session:

الجراحة:

Female breast ex + abdominal ex

وفيه كم واحد زيادة بيقولون لكم عليه..

 

الأنف والأذن والحنجرة:

Ear ex + nose ex + oral cavity ex

 

اكزامنيشن للفيميل برست يمكن أقدر أقول أهم سشن في هالبلوك, الدكاترة يحبوه وراح ينشرح كثير وحسب كلام الدفعات السابقة "لا يخلوا اختبار اوسكي منه".

ابدومنال اكزامنيشن ( تقريبأ نفس اللي بتاخذونه في بلوك المدسن ولكن فيه كم نقطة مهمة من ناحية جراحية ضروري تعرفونها وتعرفون كيف تطبقونها)

(طبعاً هذولا الاثنين هم بس اللي موجودين وبينشرحون لكم بشكل مفصل ولكن في الاوسكي أيضاً داخل معكم الأشياء اللي ذكرتها فوق, أطلبوا من الدكاترة يجونكم سشنز إضافية ويشرحونها لكم أو ممكن يشرحونها في الروتيشن.

فيه سشن تعليم خياطة الجروح جججداً ممتع ومسلي ومو داخل بالاختبار.

 مع د. وفاء ممتع جداً. Ent

 

CI session:

تبع الجراحة مثل ماسبق وقلت كلها سشنات مامنها فايدة وأشياء ماخذينها في البي دي.

تبع الENT, بتشرح لكم د. وفاء الأشياء المهمة تنسأل وبتعلمكم كيف ناخذ ال هستري.

 

Interactive seminar:

مواضيع نفس فكرة البلوكات السابقة, بتكون عبارة عن مواضيع تتقسم بينكم كل قروب يسوي برزنتيشن وتعرضونه وبيكون معاكم دكتور يقييمكم ويناقشكم في التوبكس.

 

CC session:

نفس فكرة البلوكات السابقة , تتقسمون مجموعات ناس بتتقيم في الجراحة وناس في الـ ENT , بيجيبون سميوليتد بيشنت تاخذون منه هستري وتسوون اكزامنيشن وممكن الدكتور يسألكم في الحالة اللي بتجيكم.

 

الهوسبتل روتيشن: 

الجراحة: مستشفى الملك فهد + مستشفى الأحساء 

في الملك فهد تروحون بدري تدورون حالات جراحة وإذا جا الدكتور المسؤول عنكم تتناقشوا فيها, ممكن بعد تتفقوا مع الدكتور إنه يشرح لكم مواضيع مو فاهمينها.

في الاحساء عيادات وممكن تحضرون عمليات برضو.

بالنسبة لي الروتيشنز في الجراحة مملة نوعاً ما ومافيه تنوع في الحالات, أغلب الحالات تتشابه, يمكن لإني مو انترستد في الجراحة (:

 

الأنف والأذن والحنجرة: مستشفى الأحساء + CTC بتجي د. وفاء وبتشرح لكم بعض المواضيع المهمة للاختبار، وإذا تبغوا بتعيد لكم الاكزامنيشن وبتخليكم تطبقون.

 

 

الاختبارات: 

الاختبارات كانت أصعب من توقعاتنا والله, ومايجي من التجميعات كثير, خصوصاُ الفاينل كان مستواه أصعب من المد مع إنه د. هيثم أكثر من مره يأكد لنا إنه مستوى الفاينل بيكون نفس المد أو أسهل (:! يعني حتى البروبلم سولفنق تجي أشياء غير متوقعة أبداً..

(هذا الكلام يخص أسئلة الجراحة, أما أسئلة الENT  أغلبها سهل ود. وفاء جابت طاريه خلال الشرح لذلك ركزوا معها كويس وفرغوا كلامها كلمة كلمة, وغالباً ممكن تلمح لكم إيش البروبلم سولفنق اللي بتجي).

 

الاوسكي: 

ما اختبرناه عشان كورونا (:

 

نصائح: 

·     أول وأثمن نصيحة، لا تتهاونون بحجة إنه البلوك سهل, الجراحة أشوفه سهل ممتنع, أسهل من البلوكات الثانية صح بس برضو يحتاج اجتهاد ومذاكرة أول بأول. 

·     صعوبة هالبلوك كانت إنه كنا متشتتين, الدكاترة يذموا الكتاب اللي هو مصدرنا الأساسي وكان صعب إنه نذاكر من مصدر والأسئلة بتجي من مصدر ثاني, برضو دكاترة الجراحة كثار ووجهات نظرهم أحياناُ تكون مختلفة هذا الشيء زاد من صعوبة البلوك.

·     دكاترة الجراحة أشوف إنهم يركزون على أشياء ممكن ما تخطر ببالنا إنها مهمة وماحسهم متعاونين كثير صراحة.

·     د. وفاء, عسل تنحط ع الجرح يبرئ, مخلصة كثير في الشرح تشرح بذمة وضمير ومتساعدة كثير, الشيء اللي مو مهم تقول إنه مو مهم ومايجي في الاختبار, تحذف بعض المواضيع اللي مالها داعي, طلبنا منها تسوي لنا مراجعة قبل الميد في جميع المواضيع ووافقت, والمراجعة هذي كنز لازم الكل يحضرها لإنها بتشرح الأشياء المهمة في كل توبك.

·     بالنسبة لد. هيثم, الدكتور هادي وبارد شوي (صعب إنه الشخص يسحب منه كلام) ومثل ما قلت فوق , نكبنا في الفاينل للأسف..

 

ـــــــــــــــــــــــــــــــــــــــــــــــــــــــــــــــــــــــــــــــــــــــــ

 

 

 

 

 

 

 

 

 

 

 

 

 

 

 

 

 

 

 

 

 

 

 

 

*بلوك المدسن أنا درسته عن بعد بسبب كورونا لذلك استعنت بزميلتي جمانه الماجد اللي درسته قبلي عشان تعطيكم نبذة أوضح وأفضل عن البلوك.

 

 

 

 

-      Medicine block

 

 

الكوردنيتر:

د. خالد

الدكاترة اللي يدرسون بالبلوك:

الكارديو/ د. عماد (قروب A)، د. إيمان الشيخ (قروب B)

البولمو/ د. آغا (قروب A)، المفروض د. زينب (قروب B) لكن بدالها جاء لنا د. نوشاد :$ !

سيمينار الكارديوبولومناري/ د. آمنه العامر (قروب A)، د. آغا (قروب B)

الديرما/ د. فيروز & د. ولاء (قروب A)، د. جويل & د. مهدي (قروب B)

سيمينار الديرما/ د. فيروز (قروب A)، د. مهدي (قروب B)

الجي آي/ د. سمية (قروب A)، د. عبدالله (قروب B)

الجينيرال/ د. مرتضى (قروب A)، د. إيمان (قروب B)

** للأمانه هذا التوزيع اللي حصل في كلسترنا لكن على الأرجح إنه يتغير بكل كلستر.

 

المواد و ترتيب أسابيع CTC:

شخصيًا درست بلوك المدسن في السمستر الثاني ف كان فيه قرار تقديم الإجازة وتقلصت أسابيع السي تي سي إلى ٣، ف ما عندي علم كيف كان توزيعها لما كانوا ٤.

لكن ترتيب الأسابيع الثلاثة وقتنا كان كالتالي:

الطالبات: (١) كارديو-بولموناري، (٢) ديرما ، (٣) جي آي & جينيرال مدسن

الطلاب: (١) ديرما، (٢) جي آي & جينيرال مدسن، (٣) كارديو-بولموناري

الأسبوع نفسه غالبًا فيه سشن CiA، سيمينار، +/- سشن اكزامنيشن.

 

-      السيمينار:

في كل أسبوع المفروض تقدم لوحدك برزنتيشن للسيمينار أمام قروبك، لكن باسبوع GI&General البرزنتيشن تسويه بمشاركة زميل/تك. وفكرته جديدة شوي؛ تجيب حالة مختصرة جدًا متعلقة بالمرض اللي المفروض تشرحه (بناءَا على رقمك بالكلستر، تشوف المرض الموجود بالروستر)، وتشرح ايش الفحوصات اللي المفروض تعمل وكيف تعالج الحالة. 

 

-      الإكزامنيشن:

في أسبوع الكارديوبولومناري فيه سشنز عن الهارت ساوند (النورمال & الباثولوجكال) هذه ممكن تجي بالرتن خصوصًا أسئلة المرمر.  بقية الإكزامنيشن مذاكرتهم هي للاوسكي / إذا عندك CC بنفس الأسبوع، لكن لو وسعكم الوقت إن تحَضرون للسشن عشان المشاركة & تسهيل لنفسكم وقت مذاكرة الاوسكي بيكون شي عظيم. 

 

-      سشنز CiA:

النقطة السلبية في بلوك المدسن إن السشنز ما تعطي التخصص حقه، مقارنة ب البلوكات الأخرى & حتى الحالات القليلة اللي تناقشونها بالسشن مالها دخل بمواضيع الميد.  ف شخصيًا كنت اذاكر  من مواضيع الاختبار اللي نوعًا ما يشبه موضوع المناقشة بالسشن اليوم الثاني عشان أحاول أشارك خلال السشن بنفس الوقت ما أأثر على مذاكرة الإختبار.

*باستثناء الديرما كانت المواضيع كلها نفسها حق الميد ونفسها حق الفاينل وهذه نقطة رهيبة جدًا.

**للأمانة ماعندي علم عن وضع درجات الدكاترة في تقييم السشنز، لكن حاولوا قدر الإمكان تثبتون وجودكم وتشاركون (حتى لو خطأ، لابأس بالخطأ!) لأن حرام ١٠٪ اللي هي درجات السي تي سي تروح وهي باليد.

 

 المراجع:

المرجع الأساسي كان كومار & كتاب الديرما Fitzpatricks

* كتاب الديرما يستحق الشراء صراحة، المذاكرة الأساسية المفروض تكون منه؛ كل كلمة منه مهمة جدًا وتشوفون فيه سؤال بالتجميعات متعلق عنها.

** كومار كتاب سيء جدًا صراحة، ف في معظم المرات استبدله ب مانيوال ميرك أو كتاب set up to medicine .

 

الهوسبتل روتيشن:

الكلستر يتقسم ٤ مجموعات، كل مجموعة تحضر المستشفى والمفروض تأخذ حالة عن نفس التخصص اللي بالجدول عشان تقدمها للهوسبتال اسسمنت. 

-      الديرما

يومين في عيادات الجامعة، بعد هذه اليومين المفروض تختار حالة تقدم عندها برزتيشن بالهوسبتال اسسمنت.  لكن بعض الدكاتره قيموا طلبتهم اثناء الروتيشن إن ياخذون الهيستوري من مريض و يسألهم عن الحالة؛ شخصيًا اشوفها طريقة غير منصفة لإن بس ٦ أمراض درسناها و المرضى اللي يجون غالبًا عن مرض ماتعرفه اصلًا.

-      الكارديو، الجي آي، البولمو:

كم يوم في مستشفى الاحساء وكم يوم في مستشفى الملك فهد (الطلاب في مستشفى والطالبات في مستشفى).

المثير للإهتمام إنك تحضر كل أيام هذه التخصصات في نفس، وهنا فوضى صراحة.  الدكتور اللي يجي معكم من الجامعة للمستشفى يكون ماسك المجموعة الثانية اللي جاية المستشفى نفس الوقت& الأدهى إنه على الأرجح يكون تخصصه غير اللي بجدولك وجدول المجموعة الثانية!

مثلًا إحدى الأيام كان بجدولي كارديو، جدول المجموعة الأخرى كان جي آي، لكن الدكتورة كانت دكتورة جينيرال وكنا نناقش حالة SLE!! المثير للإهتمام إن د. إيمان الشيخ (كارديولوجست) كانت موجودة مع المجموعة الثالثة اللي كان تخصصهم ذاك اليوم بولمو -ـ- !!

 

اما مستشفى الاحساء بمعظم الأوقات ماكانوا يسألون عن الحضور & ماكانوا مفيدين ابد، ف اسألوا القروب اللي حضر نفس التخصص قبلكم لو كان الحضور مفيد و سألوا عن الأسماء؛ لو لا استغلوا الوقت بالمذاكرة افضل.. للأسف.

 

الاختبارات:

-      CC :

مرة وحدة خلال البلوك حسب الروستر ممكن تعرفون وشو التخصص اللي راح تتقيمون فيه، لو كان اسمك في أسبوع فيه تخصصين (مثلا الأسبوع الثالث اللي فيه جي آي وجينيرال) اسألوا الكورنيتر و يقول لكم أي تخصص منهم.  واسألوا الكلستر اللي درس البلوك قبلكم وشو الحالات اللي جات لهم لأن غالبًا بتكون نفسهم.

-      الميد تيرم (١٥٪):

 ٢٠ MCQ  و ٥ حالات بروبلم سولفنق.

-      الفاينل (٢٥٪):

 ٣٠ MCQ  و ٥ حالات بروبلم سولفنق.

-      اوسكي (٣٠٪):

١٢ ستيشنز؛

٥ اكزامنيشن/ هارت، بولمو، ابدومن، ديرما و (إما ثايرويد أو SLE )

٤ ملتي ميديا

١ هيستوري تيكنق عن أي تخصص من البلوك

١ تريتمنت بلان & ستيشن أخرى لتكملة الكتابة؛ الكوردنيتر غالبًا يحدد من أي تخصص راح تجي الحالة

 

-      نصائح عامة للبلوك:

-      الكوردنيتر يعطي لستة لمواضيع الاختبار لكن كل شوي يغير فيها وهذا شيء مزعج نوعًا ما.

-      مهم جدًا إن ما تخلصون كل أسبوع إلا وانتم مخلصين مذاكرة المواضيع المتعلقة فيه (خصوصًا الفيميل؛ اخر أسبوع عندنا كان الجي أي والجينيرال و المواضيع المتعلقة بهذا التخصصين كانوال الأطول/ الأكثر)، حاولوا قدر الإمكان إن المواضيع اللي تذاكرونها شوي متعلقة باللي راح تناقشونه بالسشن اليوم الثاني عشان كذا تعتبرون مذاكرتكم تحضير و بنفس الوقت استعداد للإختبار.

-      البلوك مقارنة بالموفمنت و اللايف سايكل كان أخف وطأة صراحة، واحتمال كبير انك تأخذ درجة حلوه.   لكن للأمانة من تجربتنا؛ بعض الأسئلة كانت غبية جدًا بالاختبار ولها عدة اجابات، ساعات الكوردنيتر يكون متفهم لما ترسل له وجهة نظرك ويحذف السؤال وساعات يصر إنه كويس رغم إنك راسل له كلام الكتاب حق الحلين الموجودين! وهذه من ضمن النقاط السلبية بالبلوك صراحة.  لكن اكرر؛ بإمكانكم تجيبون درجة عالية في البلوك.

-      في البروبلم سولفنق اكتبوا كلل شي تعرفونه، بما فيه admission لو كان المريض غير مستقر، لما يجي سؤال management  فهم يقصدون التحاليل مع العلاجات مش بس العلاج.

 

المذاكرة؛

- الكارديو؛ للأمانة الدكتورة ماكنت تلتزم ب معلومات الكتاب، ف المذاكرة من مصدر غير كومار ماكانت تفرق.  لكن المواضيع اللي هي شرحتهم بالسنوات السابقة ذاكروا تفريغاتها & طلبوا منها سشنز اضافية تشرح لكم المواضيع اللي ما انشرحت سابقًا.

فيه كثير اسئلة من سشن الابنورمال هارت ساوند.  فَ اطلبوا من القروب اللي تشرح لهم د. ايمان يفرغون لكم السشن او اقرأوا التفريغات السابقة.

 

- البولمو؛ د. آغا مايطلع من معلومات الكتاب، لكن للتسهيل هو يشرح approach للتشخيص لقروبه وهذا عظيم جدًا.  ف لو د. آغا ماجا لقروبكم افتحوا التفريغات السابقة له / طلبوا منه يشرح لكم.

 

 

-الجي آي: الاسئلة كانت عادية ممكن تحلها حتى لو ذاكرت من مصدر اخر غير كومار & د. سمية و د. عبدالله ساعات بالسشن يلمحون لمعلومة وتجي فعلًا بالاختبار ف مهم التعاون بالكلستر ان الجميع يشارك هذه النقاط.

 

- الجينيرال؛ امراض الثايرويد كانت كلها معنا و فقط نوعين من اللوكيميا.   اللوكيميا تفريغ سشن د. مرتضى تكفي، و الثايرويد للأمانه فيه كم سؤال مش من كومار لكن حذفهم الدكتور.

 

الديرما؛ الكتاب هو المصدر الأساسي وكل كلمة فيه مهمة حتى شرح الصورة.  الدكاترة متعاونين جدًا فيما يتعلق وشو تركزون عليه.  ساعات بالسشن يطرحون كم معلومة يقولون لكم مهمة ومش موجودة بالكتاب وتجي، ف مرة اخرى التعاون بين طلبة الكلستر مهم.

 

بشكل عام؛ الباثوفيسيلوجي مش معنا باستثناء الديرما.

 

ـــــــــــــــــــــــــــــــــــــــــــــــــــــــــــــــــــــــــــــــــــــــــ

 

تمت بحمد الله

 

"تذكروا دوماً إنكم أطباء المستقبل.. وأن العروج إلى القمم مضنِ جداً

ولكن متعة الوصول لا تضاهى.

 

 

 

ملاحظة:

أحب أشكر زميلتي جمانه الماجد ..

+

كل اللي مكتوب عبارة عن تجربتي ورأيي الشخصي، مع كل الاحترام والتقدير لكل اسم ذكر بين سطور هذه المدونة.  وبخدمتكم لإي استفسار .

 

بالتوفيق للجميع.

زينب يوسف.